may 2009..letzte Wochen in Australien

dear blog-readers

...zit isch wortwoertlech gfloge...sit mim letste iitrag sind scho oeppe 5 wuche vergange. stah blibe mit minere reisedok. binich in perth, womer es paar taeg lang oeis vo dere nullarbortour erholt haend. am 21. april haend d'martina und ich oeis vo de lea muesse verabschide, will si daenn scho grad diraekt uf cairns gfloge isch und es paar taeg spoeter scho wider id schwiz gange isch...

mir zwe sind daenn au witer, aber noed nach cairns sondern nach darwin..au in norde. oeise flug isch i 2 teil iteilt xi..vo perth nach alice springs und vo alice springs nach darwin. de 1. flug isch gar noed nach mim gschmack xi...es haett fuerchterlilch gschuettlet und gmacht und d'landig isch au ueberhaupt noed aagnehm xi. d'flueger sind nat. au noed grossi xi, will ja noed grad sehr vill luet nach alice springs flueged..aber de 2. flug isch daenn vill agnehmer xi und ich han d'ussicht ueber di roti wuesti chli meh choenne gnuesse ;)
womer am abig am 8i in darwin glandet sind und usem fluegerli usgstige sind, haetts oeis fascht erschlage. es isch soo heiss und fuecht xi. nach langem warte simmer daenn au aendlich i oisem hostel aacho...en riise pool ide mitti vom komplex und ae bar gard unedrah..aslo perfekt usgstattet..naja. i oeisem 4er schlag haetts no 2 anderi type ka, en duetsche wider mal (gits ja da in australie chum emal...) und en aenglaender..au immer sehr aghnehm...

egal d'nacht isch eh mega churz xi. am morge am 5i simmer scho wider uf und haend oeises zueg packt fuer de 2 tages trip nach kakadu. abchuehle duets noed da obe..konstanti 35 grad und immer fuecht, so dass me eigentlich au immer nass isch! zum kakadu national park: will darwin hoech im norde isch, also noech am aekuator, raegnets zimlich vill da obe. s'jahr wird eigentlich i 2 "jahreszite" iiteilt. id wetseason und id dryseason. jetzt afang may haett grad d'dryseason aagfange. de national park isch also sehr gruen und tropisch ..villi see und fluess und immer wider wasserfaell. ...und was au no ide netti norde ufe ghoert, sind d'krokodil. suess-und salzwassercrocs. isch also noed ganz ungfoerlich..es werded immer wider luet gfraesse..hauptsaechlich duetschi (isch kaen witz oder verarschig oder so, es stimmt wuekli!!!, drum sind au alli warntafle uf duetsch uebersetzt...).. mir haend au als 1. ae bootsfahrt ufeme fluss gamcht, womer noed nume krokis hand xeh sondern au vill voegel, blueme (seerose) und zuegs un sache.
als noechschts simmer daenn tuefer in park inegfahre, womer idene billabongs sind go schwuemme und chli ide hoeger sind go umelaufe. d'nacht hammer ufeme campingpaltz mit pool verbracht und mit scho bereits ufgstelllte zaelt (langwilig...)..also nueme wuekli vil abentuer. ufem wc abr haetts tonnewiis vo dene chline eidechsli, wo hutfarbig sind ka und netti spinne und schlaengli und en riise chrott isch ae no i oeisere duschi ine gsaesse. me isch also nie aelei i dem australie.
am 2. tag simmer eigentlich nume dene billabongs nagfahre, wo ud de hoeger obe sind..und daenn simmer scho wider zrugg richtig darwin..will australie isch ja ebe noed so chli, da brucht me oeppe 5 h, bisme wider zrugg isch.

in darwin haemmer daenn nomal 2 naecht i dem super hostel verbracht (iron.), miteme zimli gfuerchige zimmernachbar. de jungi kiwi schaffet une dra im resti und wohnt sit 3 moenet i dem hostel. er haett ae relativ schwierigi vergangeheit ka..und lat das eim au gard wuesse..und au, dass er immer wider mal eine verschlat oder au mal ein ewuerd umbringe..und im momaent isch sowieso gar noed guet und er isch wahnsinnig aggressiv..sehr agnemh zum mit soeim im gliche 4er schlag zsi..!!
..mir haned d'naecht und all die super brutalo film zmitzt ide nacht uebertsande und sind daenn als noechsts mitem zug vo darwin nach alice springs gfahre. 2 taeg lang dur d'wuesti dure hoettrele, chlil musig lose und useluege. ich hans total (ent)spannend gfunde!

und daenn werded mir ebe im herze vo austalie, in alice springs aacho...sone gfuerchigi stradt hanich no nie xeh. ..total verlah, ueberall sitzted die usgstossnige aboriginies am bode ume, wie so usgsetzti tier, lueged dich gross aa und laufed dir nah. ussert eim iichaufszaentrum haetts au noed vill meh ka.und waend vo eim punkt zum andere wettsch laufe, muesch oeppe 5-10 min iiraechne..so wiitlaufig isch die stadt.

d'luet warned eim au devor alei usezgah..ide nacht sowieso noed, au noed i grosse gruppe, will meh immer wider agriffe wird voe de aboriginies. grad 2 wuche bevor mir det sind xi, isch ae hollaenderin zmitzt am tag verschleppt und umbracht worde..und jede abig lauft d'polizei ume und schickt alli touris hei, wills ebe noed sicher isch.
aslo haend d'martin aund ich die 2 taeg im hostel verbracht..und mal wider echli schlaf nachegholt..de chunnt bim reise ehnder zchurz...!!!!!!!!!!!!

z'spannende am zentrum isch ja au d'natur..und die simmer daenn au go aluege.
mitem buesli simmer quer dur di roti wuesti dure richtig uluru (ayers rock), em wahrzeiche vo australie. nach oeppe 3h fahrt isch am horizont ploetzlich en rote heugel uftaucht und alli haend scho ihri kamera fuere gsuecht und sich wi chlini chind gfreut..de fahrer haett das au zimli witzig gfunde und oeis daenn nacheme zitli xeit, dass das nume en "gwoehnliche" stei isch...also ufregig fuer nuet :)...aber nach witere 3h fahrt isch de "richtig" uluru daenn doch no fuere cho und alli sind zu ihrne super schappschuess cho :)

am uluru simmer aber nume verbii gfahre und grad diraekt witer zu de olgas (kata tjuta). die huegel asammlig isch eigentlich au vill spannender als de uluru, wird vo de aboriginies aber noed als glich heilig aglueget. s'schoenste am ganze sind die luechtige rottoen vo dem stei..mitem schatte zaeme xeht das unheimlich beidruckend us. mir haend also alli oeises fluegenetz montiert (..ohni dem wirsch wahnsinnig, will die millione fluege dir eifach ueberall ane hocked. is mul, is ohr, id nase..halt ueberall wos fuecht isch) und sind i dene rocks go umetschirgge. was nice..and hot! but nice :)

am abig haemmer daenn oesi swags usgrollt (schlafseck fuer verusse) und sind na de sunneuntergang bim uluru go aluege. de waechslet ja daenn d'farbe so schoen. bi oeis leider noed ganz so schoen, wills chli bewoelkt isch xi aber nice enough.

tag 2-halbi 5 ufstah, nachere arsch chalte nacht idem super swag. daenn zum uluru bloche, d'luet usem bus gheie und ufnen 9.5km lange rundgang um de heilig uluru schicke..mit sunneufgang, wo de hammer soell si, aber noed isch xi waeg de wulche. scho wider.
de walk drum ume isch schoen xi und no raecht ueberraschend. will vo all dene touripostkarte kaennt me ja immer nume d'vordersite und mehaett de iidruck, dass de "stei" laenglich isch. isch er aber noed. er isch fascht rund vo de form her, also noed vill lenger al breit..und er xeht au vo jedere site wider ganz ander us, so dass me de chum erchaenne wuerd als uluru.

am mittag isch de ganzi zauber au scho wider verbii xi und mir haend oeis ufd fahrt nach kongs canyon gmacht. wider uebernachte im swag, naeb de dingos und schlange und de tote aboriginies..... und ich held hans au no gschafft min fuess mit de heisse spaghetti zverbraenne..well done!

am lagerfuer haetts mal wider es paar trinkspili ge, de kanadier haett so einigi kaennt und isch voll i sim elemaent xi...

churzi 5 h spoeter simmer daenn alli halb schlafwandelnd wider us de faedere und haend oeis uf ne 6 stuendigi wanderig im kings kanyon gmacht. det sind au scho es paar luet verstorbe, wills unheimlich steil abegaht..(halt en canyon)...mir haned no de sunneufgang gnosse . mega schoen waeme xeht, wie d'farbe foend ah luechte!! ich immer mit dene farbe ;)..aber si sind wuekli mega schoen det... item vo oiesre gruppe haend alli ueberlaebt und mir sind daenn am namittag zrugg gfahre nach lovely alice springs.

naechster tag: flug nach cairns, wider noerdlicher, wider heisser, wider typiger. cairns isch no e herzigi stadt..mitere lagune wome cha go bade, suscht uisch ja s'bade allgemein noed wuekli erlaubt oder empfehlenswert ade eastcoast, waeg all dene stingers und bluebottles und haie und so..

mir haend daenn no en 2 tagesusflug in raegewald nach cape tribulation gmacht. det isch me daenn wuekli definitiv ide trope..also au en richtige tropische raegewald, so wiemene z'bern im botanical garden kaennt, halt numme aecht aber genau so typpig. mir hand wider es paar krokis xeh und netti schlaengli und riiiiiiiiiiiise spinne, riise spinne, wo ueberall ghanget sind. uuaeee..nei si sind gar noed so schlimm xi, wills ja eh i ihrne netz ine hanget. defuer sind mir daenn go kokosnuess am strand vorne sammle und haned die zum zmorge gaesse, dasisch au mal es erlaebnis :)
wie sichs fuer en raegewald koert haetts au die meisti zit graegnet..aber wills ja eh so heiss isch isch das noed witer schlimm...ehner no agnehm!

nach cape trib. haend d'martina und ich mitem bus de ostkueste nah abe nach magnetic island gfahre. d'landschaft isch au da wider soo anderst. hunderti bananeplantageund ueberall grueni huegel und grossi grasflaechine. xeht chli us wie in suedamerika :)..no logisch oder ?

nach magnetic island hammer in airlie beach no en halt gamcht, womer 3 tage lang sind go saegle. das isch e super sach xi. wills waetter noed so mitgmacht haett, aslo raege und so, isch aud see chli stuermisch xi..aber umso kuuler zum saegle uf oeisem mini boot. i dene 3 taeg simmer chli go kanu fahre, vill go schnorchle und s'seefahrerlaebe gnosse. die fisch und korallevillfalt wo det herrscht isch faszinierend! de white heaven beach isch nat. au noed z'vergaesse ...wiisse strand so wit s,aug langt..wit und breit nuet ussert es paar schiffli :)

ja..nach dem saegeltrip haemmer scho oeisi letsti tour uf fraserisland ka, womer 3 tage lang mitem 4wd auto uf dere sand insle umeghopplet sind und i dene wunderschoene see sind go bade. de lesti stop vor sydney isch in surfers paradise xi, em australische miami. hochhus a hochhus, club a club und jedi maengi surfshops fuer all die surfer wosich da choemed cho "zeige"...di letse 4 taeg in autralie hammer ja daenn in sydney verbracht. das isch fuer mich wienes heicho xi..ich hans so gnosse nomal 4 taeg i dere hammer stadt choenne zverbringe, wome alles kaennt und sich nueme wie sonen touri sondern chli wie en iiheimische fuehlt. willd martina nonig z'sydney isch xi, haemmer au no es relativ straffs programm ka, demit si sovill wi e moeglich vo dere bezaubernde stadt chan xeh!! de herbst isch da scho lang iizoge und es isch vo de stimmig total anders xi als im summer, wo alles i chursem zueg umelauft und sich i de shoppingcentre gat go verstecke...

und daenn haetts ebe gheisse abschid ne vo dere stadt und dene 6 moenet abentuer..noed ganz eso eifach wiesich das villicht jetzt list...aber zerst machet mer ja mal no en stop over in singapore bevors daenn definitiv heigat :)

merci a alli, wo min blog glaese haned und ich hoff ich han oei noeigier chli choenne befridige :)

big big hug vom downtown girl