hello switzerland

soo..d'wuche wär wider düre..zit fürne wucherückblick, i maches churz: ds mit dr familie gold und em pinke zimmer het leider nid häreghout. i bi letscht mittwuch wider bi ihne uszoge. churz und schmärzlos hanis gmacht. i ha wider bir familie ma dörfe iizie,was mega nätt isch wüu süsch wäri iz so zimlech ufgschmisse!!

i wirde iz mini plän umchrämple. d.h. wahrschinlech nüm aus au pair schaffe drfür süsch jobbe und anstatt bire familie imene studentewohnheim wohne. aber ds zeigt sech i de nächste täg de aues no. isch haut im momänt grad chli schwirig wüu ja hie o wiehnachtszit isch...

so soviu zu mire letschte wuche. iz luege mer aber lieber mau i di nahi zuekunft: i ga nächscht wuche ufne surftrip :) mir gö vo sydney nach brisbane, d.h. mä isch mitemene car ungerwägs und faht dr küste entlang, so ds mä a verschidene stränd ds surfe cha lehre ;)...

i blibe de no 3 täg ds brisbane und tschegge di stadt o mau no chli us..u ga de am 22. dez. mitem flüger zrügg nach sydney. ja und denn heissts de scho gli wiehnachte fiire :)

die wirdi vorussichtlech am strand mit hunderte backpackers verbringe :) oder so ähnlech.

hüt gani mit dr fähri a watsons bay..mau wider chli am meer ga tschille :)..und süsch bini im momänt grad mini chochkünst chli am usprobiere. gester hets risotto  mit piuze, und tröchnete tomate gä..ds choche isch drbi no dr eifachscht part gsi! dir söttet hie mau ga iichooufe..s isch ä zuemuetig. i gloub australier chöi gar nid säuber choche..da isch eich aues scho fertig. fertig tomatesauce, fertig ris, fertig piuze, fertig härdöpfu, aus fertig.. sogar bouillon chasch nid choufe ohni ds nid scho d piuze drbi si oder besser eich gd zganze risotto dinne isch. i dene läde besteit gloub 3/4 us fertig produkt und dr anger 4tu us fertig produkt wome no säuber cha zäme mixe. aso z.b. chouft me denn fertig pizzabode, fertig tomatesauce und pizzachäs..stricht ds ganze zunere pizza zäme und me het doch tatsächlech z'pizza nid kouft sondern säuber gmacht!!! und o d'prise si hie rächt suspekt. einisch choschte d'nektarine 10 dollar und am nächste tag nume no 3.50 pro kilo..sowieso si hie yoghurt, frücht und gmües ettleches türer aus wende am mitag ni eim vo dene millione takeaway ständ geisch gä z'ässe choufe..

so mini liebe i mäude mi de baud wider , wenns wider öppis nöis us wit wit wäg australie git. bis denn verfüetter ig öich mit föteli..

hänet sorg, hugs and cheers