reiseplanig

grüessech mitenang,

i weiss i ha scho höllä lang nüt meh gschribe..het unger angerem dran gläge ds i am schaffe bi gsi..100%..und am wuchenänd bini aubes so uf dr schurre gsi, dsi froh bi gsi mau chli z'chille :)

wi gseit i schaffe iz für 2evolve. ds isch ä charity organisation...dene iri chunde si greepeace, amnesty international, wateraid, childfund, wwf und und und..i schaffe aus recruiter. d.h. i spriche lüt a und offeriere ihne e job..wensi interessiert si verzeui ihne um wases geit, was ihri ufgab wär etc..när machi mit ihne es interview. wedie lüt öppis druf hei ladi se när zumene gruppeinterview i..:) i rede auso dr ganz tag änglisch..und ds isch guet so! i mim student hostel hets drfür zimlech viu schwizer und holländer. i cha aso dert guet mis schwizerdütsch bruche.....

letscht wuche hanu füre big day out gschaffet..ds isch sone festivaltag, ähnlech wi dr gurte..nume a eim tag und grösser. isch ä herte tag gsi. heiss wi nume öppis aber het sech glohnt! i ha när nach arbeitschluss no chli d'festivalstimmig chönne gniesse, had arctic monkeys gseh und the prodigy..und no es paar angeri kuuli bands.

bi üs isch immer no extrem heiss. i cha aubes fasch nuid schlafe..i schwitze so!! z'melbourne heisi no ä argeri hitzewäue ka...resp. immer no. 42 grad isch bi dene sit tage..ussicht uf erfrüschig isch  nid da. mängisch hani o zimlech müeh i dere hitz z'schaffe. i bi ja dr ganz tag dusse..und i muess o di ganzi zit sta..i ha drum (und wüu mi rügge ds o nüm mit macht) uf 3 arbeitstäg pro wuche verchürzt. bi zimlech froh drum..cha so od zit hie z'sydney no gniesse.. :) mir wei no i zoo, ids opera house ä uffüehrig ga luege, a palmbeach, ids openairchino etc. a propo chino..letscht zisti bini ä fuim ga luege.."seven-poun"..mir si 7 girls gsi..aui am hüle i de letschte 10 minute..wüus wük trurig isch gsi..aso mau ke hollywoodromanze...und när, grad denn wo im fium aues würdi ufglöst wärde geit dr füüralarm los..mir heis zerscht gar nid tschegget, bis e frouestimm gseit heit mir söue sofort usem gebäude...us aune 11 chinosäu si d'lüt usegsecklet..aso ir o. mir hei dr nächscht exit usgang gno , türe ufgstosse, d'stäge abe gsecklet und hei di nächsti exit türe wöue öffne..die het aber klemmt...üs isches denn liecht unwouh worde..aber ä kollegin u ig hei d'türe gstürmt ;) und was dann? mir stö ufem dach..zoberst obe uf däm riise shoppingcentre (obe inn isch z'chino). mir hei scho dänkt mir müesse iz irgend sone fürleitere abe ga....z'gfüu umso mulmiger..bismer ä iigang is s.centre hei gfunge und schliesselch wider dusse si gsi. ufff

10 min speter het d'fürwehr entwarnig gä..nume e fäualarm. dr abe het aso ä unerwarteti wändig gno..mir hei de aui e chino guetschin aus entschädigung becho. :)

so ufregendi sache passiere hie z'sydney ;)

i bi im momänt grad mini reis am plane......obe inne finget dr mini reiserote :)

so bis gli wider, häbets guet